Sera Ké Iha Sinal Ruma Ne’ebé Hatudu Katak Ninia Mai Ne’e Besik Ona?
Iha Biblia Jesus dalabarak dehan katak Nia sei mai fali, Nia mos dehan bainsira sinal sira akontese signifika katak Ninia mai ne’e besik ona. Ita sei haree sinal sira ne’e iha ita nia sorin-sorin; iha Mundu Relijiaun, Mundu Politiku, Mundu natureza, Mundu Sientifiku, Mundu Sosiedade.
Sinal iha Mundu Relijiaun
Jesus hataan no dehan ba sira, “Kuidadu katak ema la lohi imi. Tanba ema barak sei mai hodi Hau nia naran, no dehan, ‘Hau mak Kristu,’ no sira sei lohi ema barak. Mateus 24:4-5
Entaun se karik ema ida dehan ba imi, ‘Tebes, Kristu mak nee!’ ka ‘Nia iha nebaa!’ imi keta fiar.Tanba kristu falsu no profeta falsu sira sei mosu mai. Sira sei hatudu sinál boot no milagre sira, no koko, se bele karik, atu lohi mos ema nebee Maromak hili ona. Mateus 24:23-24.
{Sinal ne’ebé mosu iha mundu relijiaun antes Jesus mai mak Prefeta falsu no Kristu falsu sei mosu mai hodi habosok ema barak, no ohin loron profeta falsu barak mak mosu ona}
Sinal iha Mundu Politiku
Imi sei rona kona ba funu sira, no lia anin kona ba funu sira. Kuidadu katak imi la sai tauk. Tanba buat hotu nee tenki akontese, maibee tempu rohan seidauk too. Tanba nasaun ida sei hamriik hasoru nasaun seluk, no reinu ida sei hasoru reinu seluk. Rai hamlaha no rai nakdoko sei akontese iha fatin oi-oin. Mateus 24:6-7
(Primeira Guerra Mundial, Segunda Guerra Mundial, funu entre Russia ho Ukraine, funu entre Timor-Leste ho Indonesia, funu sira seluk, no konflitu sira seluk ne’e kauza husi problema politiku. Jezús dehan tiha ona katak antes Nia mai fali sira ne’e sei akontese, no akontese ona)
Sinal iha Mundu natureza
Rai nakdoko makaas sei akontese. No fatin balu sei hetan rai hamlaha no moras peste. Buat nebee halo ema tauk no sinál boot sira sei mosu hosi lalehan. Lucas 21:11
Sinál sira sei mosu mai iha loro matan, iha fulan, no iha fitun sira. No iha mundu, terus sei hasoru nasaun sira, no sira sei la hatene atu halo saida tanba tasi siak no laloran boot. Lucas 21:25
(Foin dadaun rai nakdoko iha Turkia, husi 2019 to’o ohin loron ita hasoru Pandemia (moras peste) Covid 19, iha dia 20 de Abril 2023 Timor laran tomak hasoru Loro-matan nakukun iha meudia (solar Eklipse), husi tempu ba tempu fulan sai mean ka nakukun no fitun sira monu. Tsunami akontese iha Japaun no Indonesia. Rai hamlaha iha fatin-fatin. Sira ne’e hotu akontese ona no hatudu katak Jesus nia mai besik ona).
Sinal iha Mundu Sientifiku
Maibee ita, Daniel, taka liafuan nee, no tau karimbu ida ba livru nee too iha tempu nia rohan. Ema barak sei halai ba-mai, no matenek sei aumenta liu tan.” Daniel 12:4
(Ita hela iha era ne’ebé Teknolojia avansadu iha area hotu-hotu, no konsimentu ba Biblia mos aumenta)
Sinal iha Mundu Sosiedade
Ema barak nia domin sei sai malirin tanba hahalok aat nebee aumenta ba beibeik. Mateus 24:12
Maibee hanesan iha Noé nia tempu, nunee mos ho tempu nebee Ema Nia Oan sei mai. Tanba iha tempu molok rai nabeen nee sira haan hemu, sira kaben no foo kaben, too loron nebee Noé tama ba roo boot laran. Sira la hatene too rai nabeen mai ona no halakon sira hotu. Hanesan nee mos ho tempu nebee Ema Nia Oan sei mai. Mateus 24:37-39
Maibee kompriende ida nee ba, katak iha loron ikus, tempu susar sei mai. Tanba ema sei hadomi deit sira nia aan rasik, hadomi osan, gaba aan, foti aan, koalia aat, la halo tuir inan-aman, la foo agradese, la santu, la iha laran diak, lakohi halo dame, konta aat ema nia vida, la kontrola aan, halo violénsia, la hadomi buat nebee diak, sai traidór, lalais atu halai sala, loko aan no hadomi liu atu halo kontenti duké hadomi Maromak. Sira hatudu oin ida nebee hamtauk Maromak, maibee sira nega hahalok nee nia kbiit. Hadook aan hosi ema hanesan nee. 2 Timotius 3:1-5
(Mundu ne’e nakonu ho konflitu no prblema oi-oin tanba domin sai malirin, feto ho feto hola malu no mane ho mane komesa hola malu (la tuir Biblia nia hanorin), ema okupadu ho sira nia serbisu duke buka Maromak, tempu halimar ne’e iha maibé tempu ba Maromak laiha, la respeita no agredese inan aman, tolok malu, konta ema nia vida, hadomi deit osan, gaba an, foti an, la kontrola an….etc. Sira sira ne’e hotu akontese ona no akontese dadaun, hatudu katak Jesus nia mai besik ona)
Sinal Haklaken Evanejellu nian
Ema sei haklaken evanjelhu kona ba reinu iha mundu tomak nudar testemunha ba nasaun sira hotu. Depois mundu nia rohan sei mai. Mateus 24:14
(Sinal ikus antes Jesus mai mak haklaken Evanjellu ba mundu tomak, no ohin loron ema barak haklaken no haklaken liu husi Plataforma Media Sosial oi-oin hatudu katak Jesus nia mai besik ona)
ITA-BOOT RASIK HAREE ONA NO RONA ONA SINAL SIRA NE’E
Ita-Boot Hakarak Prontu Ka Lae Ba Jesus Kristu Nia Mai?