(husi tuir diabu ho kompletu to’o tuir Jesus ho kompletu)
Koñese ka lae, se mak Maria Madalena ne’e?
Iha Biblia ita hetan Maria Madalena hanesan feto ida ne’ebé tuir Jesus hanesan eskolante sira. Nia akompaña Jesus Kristu to’o bainhira ema hedi Jesus iha Kruz (João 19:25). No nia mak ema ne’ebé haree uluk Jesus kristu bainhira Jesus moris hias husi mate ka Jesus hatudu uluk nia an ba nia depois de moris hias.
Oinsa ida-ne’e bele akontese? nia feto ida, Jesus uluk hili eskolante sira mane hotu deit. No tanba saida mak laós Eskolante sira hanesan Pedro ka João mak haree uluk Jesus ka Jesus hatudu uluk nia an ba eskolante mane sira ne’ebé nia rasik mak hili. Liu fali ida-ne’e Maria Jesus nia inan rasik mós laós ema ne’ebé haree uluk Jesus bainhira nia moris hias. Maibé tanba saida mak tenki Maria Madalena? Saida mak espesiál loos iha nia? Sera ké nia nunka halo sala ka?.
Lae, nia laós espesial, nia mós laós feto ida ne’ebé nunka halo sala. Na realidade, nia mós sala nain ida, tanba ema hotu-hotu halo sala ona (Roma 3:23). Liu fali ida-ne’e Biblia dehan katak nia núdar feto ida ne’ebé diabu hitu mak tama ba nia laran (Lucas 8:2). Diabu ida de’it mak tama ema nia laran mós nia moris aat ona, sá tan diabu hitu kedas. Hitu ne’e ineteresante tebes, tanba iha Biblia hitu (7) ne’e reprezenta kompletu, entaun diabu hitu (7) iha Maria Madalena nia laran signifika ninia moris hetan ukun ka kontrola husi diabu ho kompletu. No la fasil ba Maria atu muda nia moris ona, kada desizaun hotu hotu ne’ebé nia halo hetan kontrola ona husi diabu.
Iha Lucas, Biblia laós dehan de’it Maria Madalena ne’e nakonu ho diabu hitu, maibé Biblia dehan Jesus duni sai diabu hitu husi nia (Lucas 8:2). Jesus duni sai diabu sira kompletu husi nia, no nia fó ninia moris kompletu ba Jesus, Nia tuir jesus ho kompletu iha ne’ebé de’it Jesus ba, nia tuir Jesus to’o Jesus nia mate no moris iha. Lisaun iha Biblia ne’e atu hatudu mai ita katak atu diabu hira mak iha ema ida nia laran mós Jesus bele duni sai ka diabu sira kontrola ona ema ida nia moris ho kompletu mós Jesus bele muda ninia moris ho kompletu. Jesus iha podér liu fali fali diabu hotu-hotu. No ema ida nia moris atu aat loos to’o iha ne’ebé mos sei bele hetan mudansa banhira nia husik Jesus ajuda nia.
Ne’e duni labele dehan ba ó nia aan katak ó nia moris aat loos ona no labele ona hetan mudansa. Hanoin de’it katak Jesus ne’ebé duni sai diabu sira iha Maria Madalena nia moris, nia mos bele hasai hahalok aat sira ne’ebé iha ó nia moris, NIA ne’ebé muda Maria Madalena nia moris ho kompletu bele muda ó nia moris ho kompletu.
No hanesan Maria Madalena, mai ita fó ita nia moris kompletu ba Jesus atu muda, no tuir Jesus ho kompletu.
Maromak fó bensa!