[Esperansa boot liu iha tempu hotu-hotu]
Situasaun sira difisil hanesan pandemia, moras, mate, dezastre, konflitu, injustisa social, korupsaun dalabarak halo ita laran triste, lakon korajem, lakon esperansa no dala barak ita sai vitima ba kunsekuensia husi situasaun difisil sira ne’e. Ita hotu hakarak hela iha situasaun ne’ebé hakmatek, iha fatin ne’ebé seguru no komfortavel, iha moris ne’ebé saudavel no sustentadu, maibé buat sira-ne’e susar atu hetan iha mundu ne’ebé nakonu ho pekadu. Solusaun ba difikuldade hirak ne’e labele hetan iha mundu politiku, mundu intelektual, social no mundu ekonomiku maibe hetan de’it bainhira LIURAI MAI FALI.
Tanba ne’e mai ita aprende hamutuk LIURAI NE’EBÉ ATU MAI
· LIURAI sé mak atu mai iha mundu ida-ne’e?
Apokalipse 14:14 ...Ha’u haree kalohan mutin ida no iha ema ida tuur hela iha ne’ebá haree hanesan Ema nia Oan-mane, ho koroa osan-mean ida tau iha ninia ulun.
(Ema nia Oan-mane iha evanjellu ne’e refere ba Jezús. Tan ne’e liu-rai ne’e mak Jezús Kristu rasik)
MAI ITA APRENDE SE MAK DEHAN JEZÚS SEI MAI NO NE’E EVENTU SAIDA
1. Jezús rasik dehan nia sei mai fali.
João 14:3 Ha’u sei fila-hikas mai, no lori imi hamutuk ho Ha’u; nune’e iha fatin Ha’u hela ba, imi mós sei hela ba. [ Ida-ne’e mak objetivu primariu hosi Jezús nia fila mai. No ida ne’e sai eventu LITERAL ]
2. Anju sira dehan Jezús sei mai fali
Apostolu 1:9-11 “Koalia tiha nune’e, bainhira sira hateke hela, Nia sae ba. Kalohan ida simu Nia hodi sira labele haree tan Nia. Bainhira Nia sae dadaun no sira hateke hela ba lalehan, derepenti mane nain rua ne’ebe hatais ropa mutin hamriik iha sira nia sorin. No nain rua ne’e dehan, “ Ema Galilea sira, tanba saa imi hateke ba lalehan? Jezús ne’e, ne’ebe sae ona hosi imi ba lalehan, sei fila fali mai hanesan imi haree Nia tama ba lalehan.” [Iha versikulu sira ne’e fo hatene mai ita konaba maneira oinsa mak Jezús sei mai. Tuir versikulu sira ne’e mos hatete mai ita katak Jezús nia fila mai nudar eventu LITERAL]
3. Dixipulu ne’ebe Jezús hadomi (João) mak dehan Jezús sei mai fali
Apokalipse 1:7 Nia mak Ida ne’ebé sei mai iha kalohan laran no matan hotu-hotu sei haree nia. [Tuir versikulu ne’e, Jezús nia mai fali nudar eventu VIZIVEL Katak matan hotu-hotu sei haree Nia ]
4. Apostolu Paulo mak dehan Jezús sei mai fali
1 Tessalonia 4:16 Na’i rasik sei tun mai hosi lalehan ho lian maka’as, no arkanju ida sei hakilar maka’as ho Maromak Nia trombeta sei lian. No ema ne’ebe mate iha Kristu sei moris hias uluk. [ Versikulu ida-ne’e indika katak Jezús nia mai fali ne’e nudar eventu AUDIVEL=hotu hotu sei rona]
5. Jezús dehan bainhira Nia mai fali, Nia mai ho Ninia Gloria
Mateus 24:30 No depois Oan-mane hosi Ema Nia sinál sei mosu iha lalehan: no nasaun hotu iha mundu sei tanis halerik, no sira sei haree Oan-mane mai hosi kalohan lalehan nian ho kbiit no glória ne’ebé boot.
[ Tuir versikulu ida-ne’e, Jezús nia mai nudar Eventu GLRIOZU ]
OBJETIVU HUSI JEZÚS NIA FILA MAI
A. Fo kolen ba ema ida-idak tuir Ninia hahalok.
* Apokalipse 22:12. Haree Ha’u mai lalais, ho Ha’u kolen atu fo ba ema ida-idak tuir ninia hahalok.
B. Atu fo moris-hias ba ema ne’ebe fiar ba Nia to’o mate.
* 1 Tessalonia 4:16 Na’i rasik sei tun mai hosi lalehan ho lian maka’as, no arkanju ida sei hakilar maka’as ho Maromak Nia trombeta sei lian. No ema ne’ebe mate iha Kristu sei moris hias uluk.
C. Atu Lori ita ba fatin ne’ebe Nia prepara ona mai ita
* João 14:3 Ha’u sei fila-hikas mai, no lori imi hamutuk ho Ha’u; nune’e iha fatin Ha’u hela ba, imi mós sei hela ba.
D. Atu hela iha ho Nia iha fatin laiha ona problema, moras, sala no mate
*Apokalipse 21:4 No Maromak sei hamoos sira nia matan-been hotu, iha ne’eba sei laiha ona mate, laiha ona terus, laiha ona tanis, no laiha ona moras, basa buat tuan nian liu tiha ona.
IHA MOMENTU NE’EBA SEI IHA GRUPU RUA DE’IT BAINHIRA JEZÚS MAI FALI
1. LA PRONTU (LA PREPARA-AN) Apokalipse 6:15-17 Tuirmai liurai sira hotu rai ne’e nian no ema-boot no riku sira hotu, governadór no komandante sira hotu ema hotu-hotu, atan no la’ós atan ... sira dehan ba foho no fatuk sira, Monu ba ami-nia leten ba, no subar ami husi Ida ne’ebé tuur iha kadunan ... : Basá loron boot nia laran nakali nian mai tiha ona; no se mak bele aguenta.
[Sira ne’ebe la prepara-an sei halai husi Jezús no hakarak mate duke moris iha Jezús nia oin]
2. PRONTU ( PREPARA-AN) Izaiah 25:9 ... Haree ida-ne’e mak ita-nia Maromak; ita hein ona Nia, no Nia sei salva ita: Ne’e mak ita-nia Na’i, ita hein ona Nia; mai ita haksolok no kontente iha Ninia salvasaun.
[ Sira ne’ebe prepara-an sei kontenti ba Jezús nia mai fali]
HILI RASIK BA ITA-BOOT NIA-AN: HAKARAK PRONTU KA LA PRONTU