Naran iha Sertidaun Batizmu Vs Naran iha Livru Moris nian Ida ne’ebé mak importante liu?
Batizmu nu’udar seremonia ida ne’ebé importante liu, ida ne’e hahu no pratika desde João Batista nia tempu to’o ohin loron. Bainhira João Batista mai fo Batizmu iha mota Jordaun, Nia mai fo Batizmu arependimentu nian no ema barak mai simu Batizmu husi Nia no konefesa sira nia sala (Mateus 3:5,11). Iha tempu ne’eba Jesus Kristu mos mai simu Batizmu. Jesus viajen husi husi Galileia to’o mai jordaun hodi simu. Maske dook, maibé ne’e importante tanba ne’e nia mai.
“Bainhira Jesus hetan batizmu, Nia sai kedas hosi bee laran. No tebes, lalehan nakloke ba Nia. No Nia haree Maromak nia Espíritu tuun mai hanesan manu pombu ida nebee tun ba Nia. No tebes, lian ida hosi lalehan dehan, ‘Ida nee mak Hau nia Oan Mane nebee Hau hadomi. Nia mak halo Hau kontenti liu.’” Mateus 3:16-17
Lisaun nebe ita bele aprende husi João fó Batizmu no Jesus hetan Batizmu mak: João fo Batizmu arependimentu, laós fo Batizmu atu sira hetan sertidaun. Ema sira mai Batizmu, laos tanba atu hetan sertidaun maibe arepende no hakarak husik sira nia sala. Depois de Batizmu mos laos atu hetan sertidaun, ida ne’e laos sira nia objetivu atu mai Batizmu hodi hetan sertidaun.
Entaun Batizmu ne’e aplika ba ema sira ne’ebé hatene ona arepende sira nia sala, ema ne’ebé hakarak entrega moris tomak ba maromak. Ema sira ne’ebé seidauk hatene arepende sira nia sala, ka sei kiik hanesan bebe labele simu Batizmu.
Iha Marcos 16:16 hateten “Nia ne’ebe fiar no simu Batizmu sei hetan salvasaun maibe nia ne’ebe lafiar sei hetan kastigu”. Iha Versikulu ida ne’e hateten katak nia ne’ebé fiar no simu Batizmu sei hetan salvasaun, siginifika Batizmu ne’e ho objetivu atu hetan salvasaun la’os Batizmu atu hetan sertidaun. Ne’e duni labele simu Batizmu tanba deit sertidaun, Batizmu tanba ita fiar ona Maromak no hakarak atu hetan salvasaun. Anota mós iha ne’e katak fiar mak foin Batizmu laós Batizmu mak foin fiar.
Iha Roma 6:3-6 hateten “ imi hatene ka lae, katak ita hotu ne’ebe simu ona Batizmu iha Jesus kristu ne’e simu Batizmu iha ninia mate?. Ida ne’e hakoi ita tiha ona ho nia liuhusi Batizmu iha mate, atu nune’e, hanesan kristu moris hias ona husi mate liuhusi aman nia gloria, ita mos sei lao iha moris foun. Tanba se ita ida deit ho nia iha mate hanesan ninian, ita sei ida deit ho nia hodi sai moris hias hanesan Nia. ita hatene katak ita nia an tuan ne’e ita prega ona ba kruz hamutuk ho nia, atu nune’e ita nia isin sala nian laiha ona. No husi tempu ne’e ba oin ita la sai atan ba sala.”
Iha versiku ne’e fo hatene mai ita katak, Batizmu hanesan hakoi mate no moris hias, ita prega no hakoi ita nia moris tuan iha bee laran nudar simbolu mate no hakoi ho Nia no sai mai iha moris foun. Tanba ne’e liafuan Batizmu ne’e rasik mós bainhira ita haree ninia signifika original iha gregu, ne’e dehan katak “Batizo”-signifika ‘imersaun’ ka hatama hotu ba bee laran no hasai fali. Ne’eduni bainhira ema ida batizmu tenki hatama hotu isin loloon ba laran no sai mai nu’udar simbolu hakoi moris tuan (moris sala nian) no sai mai moris foun (moris tuir Jesus), hanesan Jesus mate no hetan hakoi tanba ita nia sala, ita mos hakoi ita nian moris tuan hamutuk ho nia iha bee laran no hanesan Jesus ne’ebé sai mai husi rate ita mos sai husi bee laran ba moris foun.
Ho versiku sira ne’e fo hatene mai ita katak, ita laós simu Batizmu hodi hetan sertidaun maibe Batizmu tanba ita arepende hodi hetan perdaun (apostolu 2:38) no hetan salvasaun (Marcos 16:16).
Bainhira Jesus Kristu hasoru Nicodemos, Nia hateten ba Nicodemos katak se ema ida la simu Batizmu nia labele tama ba reinu lalehan, Nia dehan, “Tebes, tebes, Hau dehan ba o, se ema ida la moris hosi bee no hosi Espíritu, nia la bele tama ba Maromak nia reinu.” João 3:5
Tanba ne’e, labele simu Batizmu hatene importansia husi Batizmu, labele simu Batizmu karik ita boot seidauk arepende, labele simu Batizmu karik itaboot seidauk fiar, no labele simu Batizmu karik itaboot lakoi hetan salvasaun no lakoi tama reinu lalehan.
Maibé simu Batizmu bainhira itaboot hatene ona:
Ho ida ne’e maluk sira, labele simu Batizmu tanba de’it itaboot hakarak itaboot nia naran iha sertiidaun, simu Batizmu tanba hakarak hetan salvasaun no hakrak tama reinu lalehan.
Sertidaun ne’e hanesan hanesan evidensia de’it katak itaboot Batizmu ona no tama ona ba igreja ida, maibe ita-boot Batizmu ne’e itaboot hatene ona no tuir ona prosesu sira ne’e ka lae, tenki tuir prosesu sira ne’e mak importante liu. Naran iha sertidaun sei la salva itaboot.
Ne’eduni, labele simu Batizmu tanba sertidaun, no Batizmu de’it maske sertidaun laiha, importante mak ita boot fiar, arepende no halo tuir.
Naran iha sertidaun Batizmu, la lori itaboot ba lalehan, maibe ema ne’ebe ninia naran hakerek iha livru moris nian mak bele tama ba reinu lalehan, ema ne’ebé ninia naran la hakerek iha livru moris nian sei soe nia iha ahi infernu hanesan hateten iha Apokalipse 21:15 “ No ema sira nebee naran la hakerek iha livru moris nian, sira mos soe tama ba iha lago ahi.”
No atu itaboot nia naran hakerek iha livru moris nian, ita boot presiza simu Jesus, entrega ita-boot nia moris tomak ba nia ho fiar, halo tuir Maromak nia liafuan sira no hamoris moris ne’ebé Maromak hakarak mak ita boot sei hamutuk ho Maromak iha reinu lalehan.
Maromak fó bensa!