“…Nune’e ema Israel sira bele la’o liu husi tasi ne’e nia klaran iha rai maran.” Exodu 14:16
Ó iha ne’ebé? Ó iha problema laran hela ka? Ka iha desafiu ruma ne’ebé impede hela ó atu ba to’o ó-nia fatin objetivu? Ne’e triste maibé ida ne’e mak realidade katak bainhira ita atu sai susesu sempre iha desafiu ka problema ruma ne’ebé impede ita. No dalaruma dezafiu ka problema ne’e boot liu ba ita hodi halo ita hanoin katak laiha ona dalan ba ita atu to’o ita-nia mehi, planu ka fatin ne’ebé ita hakarak ba.
Bainhira povu Israel sai husi Ejitu atu ba rai Kanaan sira hasoru desafiu oi-oin iha dalan hanesan; aihan no bee menus, kole, inimigu sira ataka, maibé defafiu ida boot liu sira hasoru mak tasi Teberau. Tanba bainhira sira viajen to’o iha ne’ebá, sira atu ba oin la diak tanba tasi, sira atu ba sori-sorin ladiak tanba dalan laiha, sira atu fila ba kotuk ladiak tanba Faraó ho ninia militar mai iha sira nia kotuk atu ataka sira. Ida-ne’e halo ema Israel balu komesa murmura no balu komesa koalia aat hasoru Moisés ne’ebé dirije sira. Maibé Moisés dehan ba sira “…keta tauk, hamriik metin no haree salvasaun ne’ebé mai husi NA’I, ne’ebé Nia sei halo ohin loron, imi sei la haree tan ema Ejitu sira ne’e. NA’I rasik mak sei funu iha imi-nia fatin, no imi sei nonok de’it. No Maromak dehan ba Moisés “…haruka ema Israel lao ba oin. No foti ó-nia ai tonka no lolo ai tonka ba tasi hodi fera tasi ne’e. Nune’e ema Israel sira bele la’o liu husi tasi ne’e nia klaran iha rai maran.” Exôdu 14:13-16.
Bainhira sira halo tuir no Moisés lolo ai tonka ba tasi, Maromak halo fera tasi ne’e, no ema Israel la’o iha tasi klaran iha rai maran. No tasi ne’ebé nudar desafiu boot ba sira sai fali hanesan moru iha sira nia liman loos no liman karuk. Exõdo 14:22. Bainhira ema Israel sira sai ona husi tasi klaran Maromak haruka fali Moisés atu lolo ai tonka ba tasi no tasi taka fila fali, Faraó ho ninia militar sira ne’ebé duni ema Israel mate hotu iha tasi laran, laiha ida mak moris. Neduni maluk sira, istoria real ne’e hanorin ita katak Maromak nunka husik ita atu hasoru desafiu ka problema ruma mes-mesak, Nia sei luta ba ita no Nia sempre iha dalan atu resolve ita nia desafiu ka problema oi-oin ne’ebé impede ita. Tanba Nia mak ita nia protetor no ita nia dalan. Nia bele loke dalan iha desafiu laran no bele halo ita nia desafiu no problema sai fali moru hodi proteze ita.
Hanoin ida-ne’e,
Bainhira laiha ona dalan ida ba ita, Maromak sempre iha dalan barak liu atu fó solusaun
Fiar ba Maromak no husu Ninia ajuda!
Maromak fó bensa!