Ema hotu fó sala ba ó ka? Ka ema hotu hakarak ó hetan kastigu tanba sala ne’ebe ó halo? Triste maibé ida-ne’e mak realidade, ita bele halo diak dala barak, maibé bainhira ita halo sala dala ida, ema hanoin de’it mak sala ne’ebé ita halo duké buat diak hotu ne’ebé ita halo. No dala barak bainhira ita halo sala ruma, ema hakarak ita hetan kastigu.
Ida-ne’e laós akontese de’it ba ó, maibé akontese mós ba feto ida ne’ebé kaer toman bainhira halo sala adulteriu. Ema eskriba no farizeu sira lori feto ne’e ba Jesus no dehan “Tuir Lei, Moisés haruka ita atu tuda mate nia ho fatuk, maibé Ita-boot dehan oinsa? Sira koalia hanesan ne’e hodi koko Nia, atu sira bele akuza Jesus. Maibé Jesus hakruuk no hakerek iha rai ho Ninia liman fuan. Bainhira sira husu nafatin, Nia hamriik no dehan ba sira, “Imi ida ne’ebé mak nunka halo sala, husik nia mak tuda uluk fatuk ba feto ne’e.” No Nia hakruuk fali no hakerek iha rai.
Bainhira sira rona liafuan ne’e, sira ida-idak sai deit, hahú hosi sira ne’ebé katuas liu. Ikus mai, Jesus hela mesak, no feto ne’e hamriik iha Ninia oin. Bainhira Jesus hamriik, no haree ema sira ne’e ida mós la iha ona, só feto deit, Nia dehan ba feto, “Feto, sira ba ne’ebé? La iha ema ida mak kastigu ó ka? Feto dehan, “La iha, Nai.” No Jesus dehan ba nia, “Ha’u mos la kastigu ó. ba no hosi agora ba oin labele halo sala tan.” João 8:4-11.
Eskriba no farizeu sira hakarak koko Jesus no kastigu feto ne’e, maibé Jesus halo sira hotu-hotu rekonese katak sira sala nain hotu, no la fó kastigu ba feto ne’e. No Jesus ne’ebé nunka halo sala mós lakoi kastigu feto ne’e maibé Nia hakarak salva feto ne’e.
Neduni, bainhira ema trata aat ó, no hakarak kastigu tanba ó halo sala ruma. Mai ba Jesus de’it, tanba nia hakarak fó livre ba ó no hakarak salva ó. No bainhira Nia salva ona ó, ó labele repete tan sala ne’ebé ó halo ona.
Hanoin ida-ne’e
Jesus hakarak fó perdaun ba ó, no hakarak salva ó
Mai ba Nia bainhira ó halo sala!
Maromak fo bensa!