…“Aman, foo perdua ba sira, tanba sira la hatene buat nebee sira halo.”… Lucas 23:34
Ó laran moras hela ba ema ida ka? Ka ó odi hela ema ida tanba nia halo aat ba ó?. Núdar ema, dalaruma susar loos ba ita atu haluha hahalok aat ne’ebé ema ida halo mai ita. No susar liu tan atu fó perdua ba ema ne’ebé halo aat.
Jesus mós hasoru hahalok aat sira ne’e bainhira Nia sei iha mundu ida-ne’e; ema koalia aat Nia, ema duun Nia, ema tafui Nia, ema kaer Nia, baku Nia no liu-liu hedi Nia ba kruz. Bainhira Nia hasoru hahalok aat sira ne’e, Nia la laran moras ka odi ema sira ne’ebé halo aat ba Nia. Maibé Nia nafatin hatudu domin ba sira.
Bainhira Nia iha kruz leten, tuir loloos Nia bele husu ba Ninia Aman atu oho hotu ema sira ne’ebé hedi Nia, maibé tanba ho domin Nia la halo nune’e, ida-ne’ebé Nia husu mak “Aman, foo perdua ba sira, tanba sira la hatene buat nebee sira halo.”
Jesus la laran moras no la odi maibé Nia fó perdua. Nia lakoi atu ema ne’ebé halo aat ba Nia ne’e senti sala maibé Nia hakarak atu ema aat sira ne’e hetan perdaun. Nia lakoi atu ema aat sira ne’e mate maibé Nia hakarak sira moris.
Molok ema hea sei la’odi Nia ba kruz, bainhira Ni ba la’o mai hodi hanorin, iha foho ida Nia hanorin ”…Hau dehan ba imi nebee rona: Hadomi imi nia inimigu sira, no halo diak ba sira nebee odi imi. Foo bensaun ba sira nebee foo malisan ba imi, no halo orasaun ba sira nebee koalia aat ba imi.” (Lucas 6:27-28).
Ninia hanorin ida-ne’e Nia pratika iha foho Kalvariu, tanba maske atu mate ona Nia nafatin halo orasaun no husu ba Ninia Aman atu fó perdua ba ema sira neébé halo aat ba Nia. Nia hadomi no fó perdua ba Ninia inimigu sira.
Neduni, núdar Kristaun ida mai ita la’o tuir Jesus nia ain fatin hodi hadomi ita-nia inimigu sira, halo orasaun ba sira, perdua sira no haluha sira-nia hahalok aat sira ne’ebé durante ne’e sira halo mai ita.
Hanoin ida-ne’e!
Bainhira susar ba ó atu perdua ema ida, hanoin katak to’o ema sira oho Jesus mós Nia nafatin fó perdua ba sira La’o tuir de’it Jesus nia ain fatin
Maromak fó bensa!